25 sept 2014
Actividades de pilates, zumba, pintura para nenos e adultos ou memoria
Segundo comunica o Servizo de Información Xuvenil e Animación Sociocultural do Concello do Rosal, estas son algunhas das actividades propostas para comezar no mes de outubro e nas que aínda hai vacantes:
-Pilates
-Zumba
-Pintura para nenos e adultos
-Axilidade mental (memoria)
Para máis información poden chamar ao teléfono 986 62 50 00.
23 sept 2014
IV Proba Automobilística "Habilidade sobre asfalto" Concello de O Rosal
23.9.14
Comentar
Esta fin de semana (sábado 27 e domingo 28 de setembro) terá lugar no aparcamento de Barbuntín e a partir das 16:00 horas, a IV edición da Proba Automobilística "Habilidade sobre asfalto" Concello de O Rosal.
Segundo confirma Amigos das Ximcanas, organizador do evento, -xunto coa colaboración do Concello- haberá premios para todos os participantes.
ACOR organiza un novo curso de manipulador de alimentos en O Rosal
Segundo comunica o Servizo de Información Xuvenil e Animación Sociocultural do Concello, a Asociación de Comerciantes do Rosal (ACOR) organiza un curso de manipulador de alimentos o venres 10 de outubro, de 10:30 a 11:30 horas no Centro Social Polivalente.
As persoas interesadas en inscribirse poden facelo chamando ao teléfono 628 875 029.
17 sept 2014
Sábado 20, "Andaina pola Senda de Pescadores Río Miño-Tamuxe PR-G 112"
Este sábado 20 de setembro celebrarase unha Andaina pola Senda de Pescadores Río Miño-Tamuxe PR-G 112, "para coñecer a ampliación da senda orixinal e a nova sinalización sobre a flora e fauna da zona. Ten unha lonxitude de 7'5 km, é de doado percorrido e a saída será as 16 horas dende o Muíño das Aceñas".
Esta andaina é gratuíta e, en caso de choiva, se aprazará para outro día. Co fin de organizar a volta, os interesados deberán anotarse no Concello, chamando ao número 986 62 50 00.
Romaría popular "O Anxo das uvas", o día 28 en San Miguel de Tabagón
O vindeiro domingo 28 de setembro celebrarase a Romaría Popular "O Anxo das uvas" na parroquia de San Miguel de Tabagón.
Tal e como reza o cartel, despois da Misa (12:00 horas) e da procesión, haberá xuntanza na carballeira para "xantar todos xuntos".
O Novás comeza a tempada 2014/15 coa defensa do seu título de campión
Informa: Acanor Atlético Novás
Xa está todo preparado para que se abra o telón da tempada 2014/2015 na Primeira Nacional.
Un novo curso no que o Acanor Novás defenderá o título de campión e coa ilusión renovada para revalidalo.
Non será doado para os homes de Modesto Augusto que durante estas 30 xornadas que comezan este sábado terán que lidiar con equipos moi reforzados coma o Cisne ou o Lalín, que combinan veteranía e xuventude, con outros habituais que volverán a acabar nos postos altos como o Calvo Xiria e Seis do Nadal... E unha serie de equipos como Luceros, SAR, que poden vencer a calquera. Como novidades están os ascendidos Cañiza e Poio.
E como non, o rival deste sábado, un Construcións Castro Chapela, que regresa a Primeira Nacional tras un ano na Prata. O seu adestrador, Fran Teixeira, unha das facianas máis populares do balonmán galego e que afronta a súa sépima campaña ao timón do Chapela, non contempla outra posibilidade que ascender. Corpo técnico e directiva agardaron ata o último momento a invitación por parte da Federación para xogar a DHP, logo do cruel descenso no pasado curso. Tras non recibir esa chamada, esperan lograr o obxetivo na pista. Para iso confeccionou un plantel digno de categorías superiores, con reforzos da talla de Paco López (ex Valladolid, Naturhouse...) ou Coke Fontenla, unha das zurdas de ouro deste deporte e que chega procedente do Guadalajara. Todo isto unido aos Chema Cid, Iago Cuadrado... O que o converten nun dos rivais a batir.
Para este compromiso, o técnico do Morrazo terá a todos os seus efectivos dispoñibles. Entre eles unha das flamantes incorporacións, Manu Martínez, que reclama "Todo o apoio da afección. Se facemos comunión entre o público e o equipo os puntos quedarán no Rosal. Sería moi importante comezar con bo pé xa que ademais é contra un rival directo. Ao noso favor pode xogar que practicamente é o mesmo equipo, e eles teñen moitas incorporacións que aínda se teñen que adaptar". Para outro dos pesos pesados no vestiario, David Lechuga, o Chapela "Será un rival moi complicado. Este ano reforzouse moito e ben e teñen un plantel amplio e de calidade." Recalcou que as claves para vencer "Serán xogar ao 110% os 60 minutos. Se cada un o dá todo venceremos, xa que non temos grandes individualidades pero si un moi bo bloque". Sobre a pretempada móstrase moi satisfeito "Foi boa. Salvo nas semifinais de Copa co Cangas no que non entramos no partido en ningún momento, no resto de citas estivemos a un gran nivel".
Para Pablo Casal, lateral zurdo do Construcciones Castro "Será un partido moi complicado. Seguramente moi diferente ao que se xogou na Copa Galicia e que se decidirá por pequenos detalles. As defensas marcarán a diferencia" Sobre o seu equipo indica que "Todavía non estamos acoplados. Tivemos moitos cambios con respecto ao último ano, pero penso que temos unha plantilla amplia e con xogadores experimentados que en partidos como o do sábado poden ser fundamentais". Ao preguntarlle polo Novás señala que "é un equipo moi traballado, que apenas sufriu cambios e que costará moito arrancarlle algún punto nesta liga". O que si ten claro e espera é que o partido se converta nunha festa do balonmán, "Este xogo é un dos clásicos do balonmán, e seguro que as afeccións, xunto ca do Cangas, as mellores de Galicia, disfrutarán e nos farán disfrutar os que estamos na pista".
Será este sábado 20 de setembro (20:00 h) no Rosal, unha das datas marcadas por ambas afeccións, que fai unhas semanas tiveron a antesala do que nos agarda este fin de semana.
10 sept 2014
Éxito total da V edición do Festival Internacional "Minho Reggae Splash"
Na imaxe, algúns dos integrantes do grupo brasileiro NOVA RAÍZ
Información e fotografías: Diego Álvarez Fernández.
A pasada fin de semana (5 e 6 de setembro) achegámonos dende Noticias O Rosal ata o V Festival Internacional de Música Reggae "Minho Reggae Splash 2014", que se celebrou na praia fluvial de Goián (Tomiño).
Destacar a coordinación deste evento músico-cultural, xunto con Xoán Lois Vila, do rosaleiro Javi Vicente, á vez compoñente do grupo Zamaramandi.
O cantante xamaicano Winston Francis en plena actuación
Temos que resaltar igualmente, a impecable organización do Festival e o exquisito trato que recibimos, xunto, por suposto, á calidade humana e profesional de todos os músicos participantes.